kitty blog to-be?

بسم الله الرحمن الرحيم

bad quality ._.
bad quality ._.

منذ تقريباًَ ثلاثة ايام قامت ثلاث قطط حديثة الولاده باختياري لأكون اماً لها ._.!

في البداية كانت قطتي يونا العجوزه (تقريباً خمس سنوات) توها ولدتهم, و هي في العاده تتركهم يموتون. و كنا متفهمين موقفها و انها هي ادرى بمصلحتهم…

على الأقل تتركهم يموتون احسن من انها تقرفنا و تاكلهم DX

المهم, هالمره استغربنا لأنها بطنها صغر لكن ما شفنا اي قطاوه محذفه هنا و هناك في الحوش كالعاده O_O
قلنا يمكن الله هداها و قررت تربيهم XD

سبحان الله طلعت صج قررت تربيهم, و قعدت على هالحال اسبوعين تقريباً, كل مره تنقلهم من مكان للثاني و لا نشوفهم, بس نسمع صوتهم XD
عاد قبل كم يوم فجأه مرضت و صارت ما تبي تفتح فمها لا تاكل و لا تشرب و لا تتنظف -_-
و طبيعي إذا ما تبي تفتح فمها (يمكن التهاب؟) ما كانت تبي تنظف الصغار و طبيعي إذا كانت ما تاكل بتكون ما تبي ترضع

في البدايه حسبناها كرهتهم و بتخليهم يموتون كالعاده ._. و خليناهم, مع انهم ظلوا يصيحون طول الليل , بس ما سوينا لهم شي. لما جا الصحباح و هم لسه يصيحون, و شفنا انها مريضه فعلاً و مو تدلع, قامت امي وخرت الأغراض الي كانوا متخبيين تحتها و حطتهم في صندوق فيه خيشه مسدوحه XD

كسروا خاطري T^T

المشكله انهم كانوا في طور الرضاعه O_O
حاولنا نعطيهم تونه مخلوطه بحليب, او حليب في صحن او في ملعقه, بس ما يعجبهم, لازم يشفطونه شفط زي ما تعودوا عند امهم ._.!

المشكله اني ذاك اليوم كانت طاقتني صخونه غير طبيعيه -_-

حست النت و كل ما بحثت في مواقع القطط الصغيره القى مكتوب: لازم تعطيهم حليب مخصص للقطط الرضيعه!
يعني شسوي اخليهم يموتون لأني ما اعرف اي طبيب بيطري؟! يوم سألت ابوي نوديهم محلات الحيوانات قال انهم ما راح ياخذونهم لأنهم اصغر من المطلوب و مو كيوت لوول

المهم اني اخيراً لقيت كم موقع لإنقاذ القطط اليتيمه, و لقيت عندهم وصفة عاجله حق القطط الرضيعه, يمكن احد يلقى هالمدونه عن طريق البحث عن وصفة حليب للقطط الرضيعه, فـ باكتب المكونات *_*

وصفة عاجلة لإنقاذ القطط الرضيعه (اليتيمه)
مع العلم ان هالوصفه عاجله فقط و لا تنفع على المدى الطويل ._. انا كنت اقرا هالتحذير في مواقع رعاية القطط و اطنش, لكن انتبهت ان القطط الي اعطيهم هالخلطه صاروا ضعيفين و كسلانين و شعرهم كله طاح و يبردون بسرعه! لكن لما اخيراً اشتريت حليب القطط المخصص بسرعه رجع لهم فروهم و صاروا يصيحون بصوت عالي و فيهم طاقه.

المكونات:
-200 ملل حليب مركز كامل الدسم غير محلى (المطلوب حليب بقر, لكن دايماً يكتبون ان حليب الماعز احسن , منين نجيب حليب ماعز؟
-200 ماء حلو فاتر (يعني تغليه و تخليه يبرد) بس انا استعمل ماي دافي بدون حوسة الغليان و التدفئه
-صفار بيضة (انتبه ما ينزل معاه بياض لأنه ممكن يسبب الإختناق
-ملعقتين مايونيز بدون نكهه (الثوم و البصل سام بالنسبه للقطط
-ملعقتين زبادي كامل الدسم
-ملعقه سيروب الذره (يصير في قسم السيروب و الحلويات, بس انا ما كان عندي فـ كنت احط سكر قد قرصة (كمية قليله جداً جداً جداً, لدرجة ان امي تستغني عنها ._.
-مغلف جيلاتين اسمه knox
(انا ما كان عندي هالجيلاتين, بس اعتقد انهم يستعملونه لأنه فيه فيتامينات و مغذيات)

الطريقه: ينحط الماي على النار لين يصير حار, يضاف له الجيلاتين و يتحرك لين يذوب الجيلاتين تماماً, يضاف الحليب و يتحرك جيداً ثم يترك ليبرد شوي. بعدين تضاف بقية المكونات وحده وحده لين تختلط كلها و تصير بحرارة الغرفة.

تنحط كلها في رضاعه خاصه للقطط او قطارة دوا بس تكون نظيفه و ما فيها اثر ادوية, أو إبرة طبيه لكن بدون الجزء الحاد (تكون الفتحه واسعه شوي و هذا هو المطلوب)
الي ما عنده اي من هذي الأشياء, فيه تصريفه ثانيه بتكتبها بعد شوي إن شاء الله

لما تنحط في الرضاعه تتأكد ان الخليط مو حار و لا بارد, لازم يكون بنفس درجة حرارة الجسم لو حطيتها على رسغك (نعم نفس حركة اختبار حليب الأطفال XD

تمسك القط الصغير بكل حذر  و تحطه على فوطة جافه في حضنك, و يكون جالس على بطنه, تقرب الحلمه من فمه و لحاله بيبدا يرضع, عادة لما القطط ترضع تبدا تكمش يدها و تدخل اظافرها لا شعورياً على الشي الي هي جالسه عليه, فـ ممكن تحط جزء من الفوطه تحت يدينه عشان يمارس هوايته بدون لا يجرحك XDD

بيشرب شوي بعدين يترك الحلمه عشان يتنفس , و بيرجع لها مره ثانيه. لما يتركها و لا يرجع ياخذها, أو يتركها بعدين يقوم و يقعد يصيح و يكلمك معناتها خلص. تقدر تربت على ظهره شوي (زي البزران لما يطبطبون على ظهرهم بعد الرضاعه XD
و تمسحه بجزء من الفوطه بس تكون مبلله بماي دافي. و ما تكون رطبه حيل لدرجة ان الفرو حقه يصير رطب لأنه بكذا يبرد جسمه

اهم شي و اقرف شي في السالفه, انك لازم لما تمسح عليه, لازم توصل التمسيح لجزء المؤخره XD
و لازم تستمر في التمسيح بلطف لين يخرج القط او يصير مستعد للإخراج

إذا ما سويت هالشي ممكن تتجمع الفضلات داخل جسم الصغير و يموت ._.
بعد ثلاث اسابيع تقريباً يصير القط يقدر يخرج بنفسه بدون تحفيز, فـ لا تخاف ما راح يظل معاك فتره طويله XD

الي محتاج يعرف زياده عن إنقاذ القطط ممكن يبحث على النت في مواقع إنقاذ القطط (لكن اغلبها باللغه الأنجليزيه)
زي المواقع التاليه الي استفدت منها

http://cats.about.com/cs/kittencare/a/kittyglop.htm

http://www.ruralroute2.com/feeding_orphaned_kittens.php

http://www.pacificanimal.org/Baby%20kitten%20formula%20final.html

بالنسبه لحليب القطط من محل الحيوانات فـ اخوي شرا كيلو حليب قطط مجفف بـ  10 ريال  و الرضاعه تجي معاها حلمه إضافيه و فرشاة تنظيف بـ خمسة ريال
على حسب عمر و عدد القطط الي عندك ممكن تزيد او تنقص كمية الحليب, و إذا كان احد متبرع يساعدك في الإرضاع ممكن تشتري اكثر من رضاعه لأنهم إذا شموا ريحة الحليب بتبدأ سيمفونيه من الصياح (اشمعنى واحد يشرب و احنا لأ ههههه)

الحليب نفسه ريحته غريبه (يذكرني بشي بس ما ادري وشو) كأنه ريحة حمص او بيت دجاج او إقط (الجبن المالح جداً الي يسوونه البدو) و في الحقيقه ما اعرف مكوناته بالضبط لأنه جاني في كيس عادي و مو علبة تجاريه
لكن البيطري قال انها خلطه خاصه من حليب البقر للقطط الرضيعه (اتوقع حليب البقر مضر للقطط الكبيره لكن الله يستر من الرضيعه)
و الكمية المطلوبه هي كاس بودرة لكل لتر ماي بدون أي إضافات أخرى

انا اسوي نص كاس لنص لتر, آخذ منها قد هالرضعه و الباقي احطه في غرشة في الثلاجه, و لما احتاجه احرك المكونات و ادفي الكميه الي احتاج بس.
القطط الي لقيتهم صغار جداً تقريباً اسبوعين, فـ ما يحتاجون إلا ما يقارب ثلاثة ارباع الرضاعه, يعني كمية نص لتر ممكن تكفيهم يوم كامل *_*

لازم تعرف عمر القط الي بتراعي عشان ما تعطيه شي يضره, او تنسى تسوي شي مهم لحياته.

بالنسبه للتصريفه حق الرضاعه, فـ هي كما التالي
المطلوب:
-خلطة حليب القطط (المستعجله او الي من محل الحيوانات)
-قفاز مطبخ مصنوع من المطاط لم يتم استخدامه من قبل و لا تفكر تستخدمه بعدين (لأنك بتسوي فيه فتحه
-الإبره الخاصه بالكريمه (تجي بخمسة ريال في محلات المطابخ و يكون معاها عدة رؤوس و جزء خلفي, إحنا ما بنحتاج إلا الإبره نفسها و أحد الرؤوس الواسعه الغير حاده

للأسف مشكلة هالتصريفه انها تسبب الكثير من التناثر و ممكن تكون الحلمه اكبر من فم القط, لكنها الطريقه الوحيده الي رضوا ياكلون بها لأنهم ما يبون ياكلون بالملعقه و لا يعرفون يلحسون الصحن ._.!

الطريقة:
نختار احد الأصابع و نسوي في راسه فتحه صغيره جداً بالدبوس (ممكن تحمس الدبوس على عود كبريت إذا الفتحه ضيقه
ممكن نجرب الفتحه عن طريق صب كمية من الماي في القفاز, إذا نزل الماي بخط مستقيم معناتها الفتحه كبيره حيل, إذا ما نزل الماي إلا بعد عصر القفاز معناها ان الفتحه ضيقه. لازم تكون الفتحه مناسبه عشان ما ينزل الحليب في رئة القطو الصغير ._.

لما يضبط معاك حجم الفتحه (ممكن تسوي الفتحه في اصبع ثاني لو توهقت XD
لكن الفتحات الأخرى بتسوي لك حوسه لما تجي تعصر الحليب ._.!
المهم, تمسك إبرة الكريمه و تدخل القفاز داخلها بحيث ما يطلع من فم الإبرة إلا الإصبع الي في راسه فتحه, بعدين تدخل راس الإصبع في راس عصر الكريمه الواسع (يكون دائري و واسع مو ضيق عشان ما ينحبس الحليب في صفطات القفاز
و تسكر عليها كأنك بتعصر كريمه لكنها على شكل مطاط XD

الحين بيصير الجزء الخلفي من القفاز المفتوح, مفتوح على برا, صب داخله كمية من الحليب (قد فنجان القهوه) و جرب تخلي راس الـ “رضاعه” على تحت, هل يتعبا الإصبع و ينزل حليب؟

امسك الجزء الخلفي من القفاز بحيث يصير مغلق و لا ينزل عليك الحليب (الأفضل تلبس مريله عشان ما تتوصخ XD
و اهم شي يكون الحليب دافي, مو تخليه يبرد و انت تشتغل ._.

الحين المرحله الصعبه *_*
امسك القط بكل لطف و حطه على فوطه في حضنك و تأكد ان الحليب ما ينزل على جسمه لأنه بيسبب التصاقات في الشعر و على الجلد و يأذيه إذا ما انغسل على طول.
بيزعجه القفاز و ممكن يرفضه في البدايه, لكن خله يعرف ان داخل هالشي المطاطي حليب, و بيعضه بحماس لما يلقى فيه اكل, و إذا قعد يشفط الحليب شفط يكون احسن, لكن بعض القطط اغبيا و ينسون يشفطون لأن ملمس المطاط على لثتهم مريح عشان اسنانهم توها تطلع
._.!

لما يشبع بيكون بطنه دائري شوي زي القربه XD
لكن المفروض ما يوصل الشبع اكثر من اللازم لدرجة تصلب البطن (واحد من الي عندي كذا مشفوح, ما يترك الرضاعه إلا بالصياح مع ان بطنه متعبي) مدري شسوي معاه هههه

طبعاً فيه اشياء إضافيه تحتاجها القطط الصغيره في هذا الوقت, مثل التدفئة الدائمة و الظلام و مكان أمين للنوم.
تقدرون تلقون كل هالمعلومات في مواقع إنقاذ القطط الي افدتني كثير

نرجع على الي عندي XD
انا استعملت غرشة كاتشب الضغاط لكن فاضيه و مغسوله, لما احط عليها الغطا تصير مغلقه بإحكام و لا تنقط, فـ أستعملتها كـ تدفئة لهم, بأن عبيتها ماي حار من الصخانه و لفيتها بفوطة مطبخ و حطيتها في احد زوايا الكرتون.
لاحظت انهم لما يكونون بردانين يلصقون فيها او ينامون فوقها, لكن لما يصير الجو حار يروحون الجهه الثانيه من الصندوق XD

و يتكركبون فوق بعض من البرد احياناً لول

الظلام سهل لأن الكرتون الي حطيتهم فيه لسه عليه الأجزاء الي تصفط و تسكر الصندوق, طبعاً انا اسكر ثنتين منهم و اخلي ثنتين عشان ما ينخنقون O_O

الحمد لله بفضل هالكرتون ما تجيهم القطط الي برا بعد لأنهم ما يشمون اكل و لا يقدرون يدخلون راسهم بين فتحات الأجزاء الي تسكر الكرتون

بس تلعوزت لأني لما اروح لهم اعطيهم اكل القى عندهم نمل متجمع على فضلاتهم ._.!

فـ أضطر اغير الكرتون كل شوي, و اغير الخيشه و الفوط الي تحتهم بعد (ابوي عصب علي ههههه
غرشة الماي الدافي لازم اغيرها كل فتره و الثانيه لما تبرد

امي تسميها: أمهم XDDDDD
تقول لي هاج امهم حطيها عندهم خخخخخخ

وين رحتي يا امهم الصجيه T_T
لو سمحتي لا تموتين ._.
على الأقل لا تموتين تحت الكراكيب الي برا عشان ما يتلعوز ابوي و هو يطلعك و يهاوشني ._. !!!

6 thoughts

  1. بصراحة انتي عطيتيني معلومات كتير استغتد منها لأن ولدت عندي قطة من اسبوع وامهم راحت ومالي عرفانة كيف اعتني فيهم شكرا كتير كتير كتيررررر بس في عندي سؤال انو فيني قص اظافرهم

  2. الحمد لله *_* و الله يجزاك خير على الاعتناء فيهم!
    في هذا العمر اظافرهم ناعمه حيل و صغيره و ما بتحتاجين تقصينها على اي حال.
    اذا كنتي بتربينهم داخل البيت ما راح تحتاجين تقصين اظافرهم لين يخلصون الشهر الرابع على الاقل
    اما اذا كنتي بتتركينهم للشارع (او حوش البيت مفتوح) انصحك ما تقصين اظافرهم ابداً عشان يقدرون يدافعون عن انفسهم ضد قطط اكبر *_*

  3. انا عندي قطتين وحده ماتت والتانية علي طول نايمه وما تتبول وتصرخ كتير وبطنها منفوخ
    ارجوكم وش اسوي

    1. اولاً الله يجزاك خير انك تعتنين بقطط رضيعه, ثاني شي القطط امهم موجوده ولا لأ؟ إذا امهم موجوده و في صحة جيده انصحك تخلينهم عندها, إذا مو موجودة (او ماتت مثل الي عندي) اول شي خذي اي غرشة عصير كبيرة فارغه او علبة زيت فارغه و حطي فيها ماي دافي و لفيها بفوطة جافه و خليها عندها في الصندوق عشان تتدفى فيها حتى لو الجو حار. اتركي مساحه في الصندوق عشان تقدر القطة تروح بعيد عن الحرارة اذا كانت دافيه اكثر من اللازم. ايضاً على حسب عمر القطة و حجمها تعطينها اكل, اذا كانت القطة ما فتحت عيونها او اخذتيها و هي مغمضه و فتحت عيونها عندك معناها انها صغيرة حيل ما تقدر تاكل اكل صلب و تحتاج حليب. تقدرين تشترين مسحوق حليب خاص بالقطط الرضيعه من محل البيطري (مو غالي و ما تحتاجين كثير, نص كيلو او ربع يكفي و يمكن ما تستعملينه كله, انا الي عندي ما شربوا حليب إلا لمدة اسبوعين مع انهم قطتين) و الرضاعه الصغيرة حقتهم. تعطينها بس شوي قد فنجال القهوة و حاولي يكون الحليب دافي. لا تسدحينها على ظهرها مثل اطفال البشر, خليها على بطنها و حطي الرضاعه في فمها و هي بترضع, يمكن تسوي حركة انها تدخل اظافرها في يدك عادي خليها ما تعور و الحركة غريزية ما تقدر القطة تتحكم فيها خخخ ايضاً لو تقدرين حطي صحن فيه تراب عشان تتبول فيه (الي عندي بنفسهم اكتشفوا الحركة والحمد لله خخخ لكن الآن خليها تتعلم على ملمس التراب يمكن غريزتها تشتغل لوحدها) حتى ذلك الوقت تقدرين بفوطة نظيفة و دافية تمسحين على جسم القطة عشان تنظفينها و اثناء التنظيف تمسحين بهدوء منطقة الإخراج لين تخرج إذا عندها شي محتبس (الأفضل تلبسين قفازات مطاط خخخ مع العلم انه ما تطلع اشياء مقززة لانها توها صغيرة و ما في بطنها غير الحليب)
      اذا كانت القطة تقدر تنط و تلعب تقدرين تحطينها في مكان اكبر شوي او تطلعينها من الصندوق كم ساعه تلعب عشان ما تحس بالوحدة (ممكن يكون سبب الصراخ جوع او ألم او برد او طفش)
      إذا كانت قطة من الشارع الله يعينك تعتنين فيها لان البيطري ما راح يضيع وقته عليها, اما لو كانت قطة شاريتها من سلالة معروفة اعتقد تقدرين تاخذينها للبيطري يفحصها و يعلمك كيف تعتنين فيها
      اذا كنتي تعرفين تقرأين انجليزي (ولو بشكل بسيط) توجد مواقع كثيرة تساعدك تعتنين بقطة رضيعه من الولادة حتى تقدر تعتمد على نفسها في كل شي,
      مثل http://www.kittenbaby.com/
      او اكتبي في قوقل baby kitten care
      اذا احتجتي اي مساعدة اخرى ارسلي لي ان شاء الله اقدر اساعدك *_*

Comments are closed.