دليلك لصنع مانغا

هذي مجموعة ردود حطيتها في منتديات الاقلاع رداً على موضوع عن المانغا العربية, لاسباب ايجادها بسهولة في قوقل بحطها في موضوع منفصل XD

لكي اصبح مانجاكا عربي إلى اين أذهب بعد انهاء قصتي مثلاً ؟ >> سؤال لطالما تبااادر إلى اذهاننا كثيرراً ؟

على حسب رغبتك لا فعلاً جميع الابواب مفتوحه انت بس ارسم

physical publishing نشر ورقي:

اي مطبعه بتطبع لك اي كتاب تبيه طالما كانت عندك الموافقات المطلوبة الي لاحظته ان الطباعه في الامارات أسهل بدليل ان اكثر من عشر قصص و مجلات مانغا منشورة هناك فعلاً
الاشياء الي تحتاجها:
1- قصتك المكتملة بكل فصولها (او الفصل الاول من القصة الي بتنشرها) بنسختها الورقية الاصلية او على هارد دسك اذا كنت رسمتها على الكمبيوتر
2- تروح وزارة الإعلام و تسجل حقوق القصة (العنوان و الاحداث) و حقوق الشخصيات (صورة ملونة لكامل جسم كل شخصية)
3- اذا كانت مانغتك مشتركه مع احد ثاني تحتاج موافقه منهم للنشر بإسمك (أو على الاقل تكتب في الاوراق ان القصة بكتابه فلان و رسم علان) انا ما مريت في هالخطوة بس اتوقع فيه خانات حق هالشيء
4- فلوس للوزارة لتسجيل حقوق المجلة (أعتقد ان الحقوق تحتاج تحديث كل سنة او كل عدة سنوات)
5- ابحث عن مطبعة معروفة وكبيرة عشان ما يزعجونك بقلة الخيارات المتاحه للوروق و الحبر, او يسرقون شغلك و ينشرونه باسمهم
6- وهو اصعب شيء: راس مال يكفي تغطية تكاليف طباعة النسخة الاولى من قصتك. اذا كنت بتطبع مثلاُ خمسين عدد بتكون التكاليف اقل من لو تطبع ميتين عدد. لكن المطابع تعطيك خصم على كل عدد كل ما زادت النسخ المطلوبة *_* (مثال: لو بتطبع عشرين عدد فقط, بيكون سعر طباعه العدد عشرين ريال, لكن لو بتطبع مية عدد بيطلع عليك العدد الواحد بخمسطعش)
7- ابحث عن ناس يبون يشترون مجلتك و بهذا خلصنا النشر ممكن تعتمد هالدليل لطباعة اعداد قليلة عشان تبيعها في مؤتمر انيمي مثل كوميك كون الي حصل من كم شهر و انباعت فيه اعداد مانغا عربية

هذي عملية النشر باختصار, لكن زي ما تشوفون العدد منشور بدون اي اعلانات و بدون اي ارباح عليها القيمة يعني لو تبي تنشر مجلتك بشكل كبير و في جميع انحاء الخليج مثل مجلة ماجد وغيرها للقصص المصورة, قد تحتاج للبحث عن ناشر موثوق فيه (للمعلومية, حتى الآن ما لقيت احد يمدح ناشرين عرب اغلب الرسامين الي اعرفهم بدأوا مؤسسة النشر الخاصه بهم عشان يتخلصون من الناشرين الكبار الحرامية خخخ)
الناشر الكبير بيقول لك: بنشر مجلتك ببلاش بس لي نسبة من الارباح, بعدين يقص عليك و ياخذ كل الارباح و يقول لك مجلتك ما نجحت
او أسوأ, فيه ناشرين في السعودية يقولون لك ادفع عشان ننشر مجلتك و لنا نسبه في الارباح يعني ياخذ فلوسك في البداية و النهاية و تجلس انت على الحديدة لا ارباح ولا راس مال

على عكس مجلات القصص المصورة الامريكية و اليابانية, هنا ما فيه شركات مستعده تضع اعلانات للشباب في مجلات قصص مصورة موجهه للشباب (اصلاً فيه منتجات موجهه للشباب؟ خخخ ) طبعاً كلنا نعرف ان الاعلانات هي الداعم الرئيسي لأي مجلة, و لما تصير الاعلانات قليلة و متباعده تكون هي السبب الرئيسي في قلة الدعم المجلات العربية للقصص المصورة

مثال حي على امكانية النشر محلياً: مجلة خيال الي تنشرها مؤسسة لون ميديا وتنطبع في الامارات مدير التحرير نفسه يرسم في المجلة و كل الطاقم خليجي (انا ارسم قصة حول العالم فيها) حتى الآن لها 11 عدد و بيكون لكل فصل نسختين عربيه و انجليزية على موقع المانغا الشقيق كوميكيا

ايضاً سوار الذهب مثال على مانغا عربية بس ما اعرف تفاصيل نشرها لان الكاتب ورسامه الغلاف عرب بس المانغا نفسها من رسم فريق ياباني والنشر في اليابان, حتى الآن لها عددين كل واحد في كتاب ( الكتب ما فيها فصول, اعتقد انها تنشر على شكل مجلدات بدون تقسيم) ما فيها اي اعلانات, ما ادري منين يجيبون الارباح خخخ

فيه قصص عربية اخرى ما نزل منها إلا فصل او فصلين من كل وحده, شفت بعضهم في كوميك كون الامارات بس للأسف ما اشتريت منهم اي شي (من الذكاء ما كنت ادري ان القسم للمانغا, حسبتها كتب عادية بس منشورة في كوميك كون لان الكاتبين عرب خخخ) من بينهم آدم101, الإعصار و نهر الأردن وغيرهم الي ما اتذكر اسمائهم الآن

هذا بالنسبة للنشر الورقي اما الي يقول ما ابي انشر على ورق الحين او ما فيني على حوسة الارقام و الارباح و الفلوس بس ابي الناس تشوف قصتي

online publishing النشر على الانترنت:
(مثال: Grey is من عمل الرسامه الاردنية juusan)

الاختيار الاول: النشر المنفرد
و هو اسهل شي في الحياة, تشتري موقع و تشتري اسم الموقع, و ترفع صفحات القصة فيه و تنتظر الناس يكتشفون موقعك و يقرأون قصتك (نسبة النجاح اقل من عشرة بالمية خخخ حتى الآن ما شفت احد ينجح بهالطريقة غير homestuck و هي حتى مو مانغا )

الاختيار الثاني: النشر في مواقع التواصل الاجتماعي مثل فيسبوك و انستاجرام وتمبلر. فيه نسبة بسيطة من الانتشار لكنها ما تكفي لان اول ما تحط قصتك او الصفحات او الفصول بتجيك عدة مشاهدات و يمكن كم رد او تفضيل, بعدين اليوم الي بعده الناس بتشوف شي جديد و تنسى قصتك. لما ترفع الفصل الي بعده الناس بتنسى وش حصل في الفصول السابقه ولا راح يتحمسون للقراءة او التعليق, و ككاتب او رسام بتفقد الحماس و تقرر التوقف عن الرسم لان ما فيه تشجيع

الاختيار الثالث: النشر في المواقع المخصصة للرسم: مثل ديفيانت ارت و ارت ايدن. فكرة ممتازة لكن لها نفس مشكلة المواقع السابقة: الناس بتنسى وش حصل في الفصول السابقه, او ان الوصول للفصول السابقه و البداة من اول فصل صعبة التطبيق بسبب نظام الموقع المجهز لرسومات منفصلة. آرت أيدن تغلب على هالمشكلة عن طريق وضع قسم خاص للمانغا و استحداث نظام سلسلة (يعني القصص الي تابعه لنفس القصة تصير في قائمة موحده لسهولة الوصول) لكن ما فيه خاصية التعليق على كل صفحة بالنسبة لي ارت ايدن هو الاختيار الثاني لنشر المانغا بعد النقطة التالية:
الاختيار الرابع: مواقع النشر المخصصة للقصص المصورة. حالياً كوميكيا هو اختياري الأول مع انه في مرحلة ما قبل البيتا النشر ببلاش و سهل وبكيف الرسام يحطه ابيض و اسود او بالالوان, يبي يحطه للبالغين او للاطفال ما فيه شروط غبية مثل النشر الورقي, و مجهز ان الفصل يكون متوفر باكثر من لغه و الشخص يقدر يتابع القصة وتجيه اشعارات لما يصير لها تحديث. في المستقبل ان شاء الله الرسام يحصل على مردود مادي لما تنحط الاعلانات في الموقع
(مثال: رسامه كويتيه راسمه قصة فيها شخصيات من عدة اماكن كهدية عيد ميلاد صديقتها خخخ فوكالويد, قينتاما, سكيت دانس وذا اوفيس)

فيه مواقع اخرى امريكية مثل smack jeeves بس الي اعرفه انهم حرامية, ياخذون فلوس من الرسام عشان ينشر قصته وياخذون نسبة من الاعلانات بعد وما يدعمون إلا القصص الي بتجيب لهم ارباح كبيرة مهما كان مستوى الرسم او القصة خبري فيهم عتيق اصلاً مدري اذا الموقع لسه موجود ما بحثت عنه من زمان خخخ
فيه مواقع اخرى بس كورية او اندونيسيه القاهم بالصدفة بس انسى كيف ارجع لهم لاني ما اعرف اقرا شي خخخخ اتوقع النشر بيكون صعب لاني ما اعرف وش تسوي الازرار

هذي إجابة سؤال “وين اروح بعد ما اخلص قصتي عشان انشرها
باقي سؤال: كيف ارسم قصتي اصلاً

أعتذر ஜRooney ஜ على الاستيلاء على موضوعك بس خليني اكب عفشي الحين عشان ما يصير لاحد عذر انه طفشان طول الصيف ولا عنده شي يسويه خخخخ

إقتباس »

بصراحه اتمنى يكون لنا طاقم خاص ينتج مانجاات ونحط لنا اسم خاص يليق بالعرب + قصص تتحدث عن عاداتنا وتقاليدينا بأسلوب جذاااب وقصص مبتكرة <

أعرف ان هالاقتراح طبيعي و يجب تشجيعه, لكن ليش؟
لا من جد, ليش لازم تكون المانجا العربية عن عاداتنا و تقاليدنا؟
ادري ان قصدك تشجعين الرسامين عن طريق مشروع محلي قلباً و قالباً, بس من كثر ما اشوف هالاقتراح صرت احس ان الناس ما بتعترف بالرسم العربي إلا لو كان يتكلم عن البيئة العربية
يعني لو ترسم ناس عاديين بدون حجاب بيقولون لك: لا هذي ما نعتبرها مانجا عربية لان الشخصيات مو في بيئة عربية
ولو رسمت آليات او خيال: لا ما ينفع لان الشخصيات مو في بيئة عربية
لو رسمت اشخاص عرب: يا اخي وش ذا احنا ما نتصرف كذا بعدين في اي دولة تصير الاحداث؟
ولو رسمت شخصية عربية بحته: يخي هالقصة بايخه كل شي فيها نفس الواقع ما عندهم خيال كلش
ولو رسمت شخصية عربية في بيئة خيالية: شعور غريب اني اشوف شخصية بحجاب تسوي شيء ما تعودت عليه
just deal with it okay خخخخخ
الحقيقة المرة هي ان كثير من الرسامين العرب ما يحبون البيئة العربية, لهذا السبب بالذات حبوا المانغا اليابانية, الي خلتهم يتحمسون لاسلوب المانغا, الي خلتهم يفكرون في رسم مانغا اصلاً.
الموضوع مو اني اكره بيئتي الي اعيش فيها و ابي اروح اليابان خخخ, لكن بيني و بينك صعب الواحد يكتب قصة واقعيه في بيئة عربية و في نفس الوقت رومانس او دراما
يعني في القصص اليابانية الرومانسية الولد يلقى فرصة يشتغل في محل الزهور حق المرأه الي يحبها, و بالتدريج يتعرفون على بعض لين تحبه هي لو بتجرب تسوي نفس المبدأ على قصة عربية اول شي البنت ما راح تشتغل في محل زهور بنفسها خخخ ثاني شي مستحيل توظف رجال, ثالث شي القاريء بيقول وع قصة عربية رومانسية ما تدخل المزاج
ما اقول لك الموضوع مستحيل الصنع, الموضوع سهل تقنياً و قصصياً ببعض القفزات الادبية, لكن المشكلة ان القاريء نفسه مو مستعد انه يسكت و يقرا لانه يعرف ان الكاتب عربي. لو ان القصة كاتبها ياباني عن شخصين يروحون للفضاء و يتعرفون على رجال آليين وينقذون العالم ما بيقول شي, لكن قصة كتبها واحد عربي لازم بيتذمر منها

إقتباس »

بصراحه في بالي اللحين فكرة مجنونة < وهي مارأيكم أن نبدا العمل جماعي في صنع مانجا تجربية كبدايه لنا ونشوف النتائج ونتعلم من الأخطاء وكمان الجمهور راح يفيدونا ..

كتبت كلام كثير و طار تصدقين شفت اقتراحات كثيرة تكرر نفس هذي النقطة بس ولا شي منهم يبدا مشروع حقيقي, لازم الفريق يكونون اصدقاء من قبل او على الاقل يعرفون بعض فترة طويلة و باب النقاش بينهم مفتوح, لان الكاتب لو كتب جزء ممل او غير مفهوم من القصة لازم الرسام يقول له “ما اقدر ارسم هذا الشيء لانه بايخ” لو ما كانوا يعرفون بعض لهالدرجة الرسام بياكل هوا و يقول طيب بجرب ارسمها, و يسحب عليهم لانه مو متحمس يرسم هالمشهد الي اصلاً ممل خخخ و لو الرسام مثلاُ رسم شي غلط غير المطلوب, او رسم الشخصية في وضعيه تختلف عن الي يتخيلها الكاتب, لازم يقول له يصحح رسوماته عشان تعكس الجو المطلوب من المشهد. لو ما كان بينهم حوار دائم و نقاش مفتوح الرسام بيرسم بكيفه و الكاتب بيكتب و هو مقهور ولا يكون العمل ممتع و بسرعه يدحدر المشروع ولا يكتمل
اما نسوي مثل الفرق الغنائية الكورية نجيب افضل رسام و افضل كاتب و افضل مستخدم فوتوشوب و نضرب رؤوسهم في بعض ويللا سووا لنا مانغا معتبره مستحيل تنجح خخخ

بعدين العمل المنفرد مو سيء, خصوصاً لنا احنا الي ما عندنا ذاك الضغط النفسي الاسبوعي مثل الي ينشرون في شونين جامب اليابانية. لو بتنشر اونلاين او في موقع للقصص المصورة انت الي تحدد متى تبي تنشر قصتك, ارسم و لون و حدد و اكتب على راحتك ولما تخلص انشر الفصل, ما يحتاج فريق

على طاري العمل المنفرد تذكرت اني كنت بحط لكم البرامج و الادوات الي ممكن يحتاجها الرسام عشان يبدا مانغا خاصه فيه. لحسن الحظ اغلب هالبرامج مجانية او لها مرادفات مجانية يعني لو بتكسب فلوس من ورا المانغا ان شاء الله تكون كلها في الحلال

بس قبل نبدا في البرامج خلنا نقرر وش الطريقة الي تناسبنا في العمل:
هل تحتاج تسوي مانغا اصلاً؟!
اي قصة تتكون من: مشاهد ذات احداث مترابطة و شخصيات, رسومات توضح هذه الشخصيات و البيئة التي تحصل فيها الاحداث, الحوار الحاصل بين الشخصيات ووصف الاشياء عن طريق تشغيل الحواس الخمس للقاريء.

طيب نفترض عندك قصة و شخصيات و تبي تكتب عنهم, حط على جنب فكرة “ما اقدر” او “ما عندي الامكانية” واسأل نفسك: وش ميولك الفنية؟ وش تحب تسوي في وقت الفراغ؟ لما تجلس لوحدك فاتح فمك ولا عندك شي يشغلك, في ايش تفكر؟

القدرة على كتابة القصة بشكل نصي: اكتبها على شكل رواية مكتوبة وخلاص (استعمل مايكروسوفت وورد او البرنامج المجاني open office)
القدرة على كتابة القصة و رسم اشخاص: أكتبها على شكل رواية تتخللها بعض الصور التوضيحية (مثل قصص المكتبة الخضراء القديمة ما ادري ليش الناس استغنوا على الرسومات التوضيحيه كنت احبها )
القدرة على كتابة القصة و رسم اشخاص+ خلفيات بسيطة: اصنع مانغا
القدرة على الرسم و التلوين واختراع شخصيات دون كتابة القصة: شارك بأعمالك في زيادة محصول المشاع العام العربي عن طريق عرض شخصياتك التي لا تريدها للتبني و اتاحه الفرصة لأي كان ان يستعملها في مشاريعه
القدرة على نسخ الشخصيات وتغيير الوانها او تسريحات شعرها: اصنع دمى التلبيس <- guilty pleasure
القدرة على الكتابة الأدبية وأحياناً ارسم شخصيات ملونه: ابدأ رواية بصرية, الروايات هذه تعتمد بشكل رئيسي على الكتابة, و الشخصيات لا تحتاج إلا صورة واحدة ثابته.
القدرة على الرسم فقط دون اي قدرات كتابية: أبحث عن قصة قصيرة أو مشهد مثير للاهتمام في حياتك, و ارسمها على شكل مانغا قصيرة (يسمونها one shot او فرصة واحدة او طلقة واحدة) اوعدك ان ما احد بيمانع يقراها طالما الرسم متعوب عليه.
لدي القدرة على الرسم و كتابة القصص لكن الوقت لا يسمح, او بسرعه انسى وش كنت اسوي بسبب تمبلر : ارسم القصص المكونة من أربعه كوادر 4 panel comic yonkoma
أحب اسوي ريمكسات او اجمع الاصوات و الموسيقى من عدة اماكن و اخلطها مع بعض: امسك مانغا موجوده و اصنع منها فيديو manga amv خخخ
ما اعرف اكتب ولا ارسم ولا ألون: كن القاريء الذي يحتاجه جميع الموهوبين اعلاه

الحين عرفنا قدراتنا و ايش الأدوات الي نحتاجها لعملنا الفني على حسب الحاجه, لرسم المانغا نفسها كل الي نحتاجه اننا نضع القلم على الورقه و نرسم

أدوات رسم
هل بترسم المانغا على ورق بيدك و قلم رصاص, ولا على الكمبيوتر بلوح تابلت على برنامج رسم؟
خبرتي ناقصه في الرسم على ورق, لكن الي بتحتاجه:
اوراق خاصه بالمانغا (او ورقه A4 عاديه للطباعه بس تكون قوية تتحمل الرسم و المسح المتكرر) الي أعرفه ان فيه محل في الكويت يبيع الاوراق الكرتونية الخاصة بالمانغا ويبيعون اللصقات الخاصة بالتظليل بتدرجات الرمادي من ماركة deleter بس ما اتذكر اسم المحل او وينه. الي عنده فكرة يفيدنا

اقلام رصاص ميكانيكية (الي تحط فيها انانبيب الرصاص الدقيقة ) ومساحات نوعية كويسة مو من النوع الي يوسخ و يشق الورقه خخخخ (انا استعمل مساحات روكو, حتى الآن هي افضل شي و ارخص شي استعملته, اشتر العلبة الي فيها عشرين مساحه ولا راح تشيل هم المسح مرة ثانية خخخخ)

و أقلام ذات رؤوس متنوعة الاحجام مثل الفرشاه الي تغير راسها حسب الحاجه او العلب الي تجي فيها خمس اقلام متنوعه الرأس ( النوعين موجودين في جرير في قسم الهندسة المعمارية, اسعارهم بين العشرين و اربعين ريال اذا ما ارتفعت الاسعار عن آخر مرة شفتهم)

او الرسم على الكمبيوتر:
تابلت تناسب احتياجاتك. أنا استعمل تابلت من شركة واكوم (افضل شركة تابلت موجوده حتى الآن, وعندهم انواع مختلفه واحجام متنوعه, احياناً جرير يجيبون النوع الي اسمه bamboo سعره يتراوح بين الـ 300 و الـ500 ريال مو متأكده بالضبط)
تابلتي شريتها من موقع أمازون قبل سنتين, الحين انخفض سعرها كثيراً لي يبي يشتريها اونلاين بس انتبهوا لسعر الشحن من امريكا للسعودية:
Wacom Intuos4 (small)
صورتها قبل الكرف خخخ

برامج رسم
ماي بينت: برنامج مجاني للرسم والتلوين, مشكلته انه ما يحفظ على هيئة فوتوشوب PSD لكن اهم مميزاته ان اللوح ما يخلص, تقدر ترسم فيه اربع و عشرين ساعه بدون ما تحتاج تكبر مساحة اللوح للرسم او تفتح صفحة جديدة, أيضاً مرفق معه خلفيات جاهزة من بينها خلفية للتخطيط للمانغا.

مانغا ستوديو: برنامج احترافي متخصص في صناعة المانغا, تحتاج لرقم التسجيل الخاص به عند الشراء, انا حصلت عليه بشكل قانوني ما اعرف من وين تقدرون تحملونه خخخ بس الرجاء ملاحظة انك لو بتبيع المانغا المصنوعه بواسطته انصحك انك تحصل عليه بطريقة قانونية عشان تضمن ان عيشك حلال
فوتوشوب: كلنا نعرفه. ممكن تستعمله جنباً إلى جنب مع البرامج الي فوق لوضع الكلام العربي لان ماي بينت ما فيه خطوط و مانغا ستوديو ما يدعم اي لغه غير الانجليزية. أو ممكن تصنع قصتك بأكملها على الفوتوشوب اذا كنت مرتاح له.
اوبن كانفاس أو ساي: برنامجين ممتازين لرسم الخطوط و الحدود, لكن ما ادري عن فاعليتهم لرسم المانغا, أعرف كم شخص يستعملهم لرسم المانغا و ماشي معاهم تمام. whatever works better for you
كوميك ووركس: نفس واجهة اوبن كانفاس و اغلب العمليات متطابقه, لكنه يحتوي على تونز و مساطر تناسب عمل المانغا استعملته عدة مرات فقط, سهل العمل و بسيط لكن ما استعملته لانهاء اي صفحة كامله او وضع تونز كثيرة

خطوات عمل مانغا مكتملة
1- التخطيط للفصل بأكمله: بسرعه كذا و قبل تطير الافكار من راسك ارسم الخطوط بشكل خربوطي و حط اماكن الاشياء بسرعه و فقاعات كلام فيها الجمل الرئيسية و زبدة الكلام و حدد كم صفحة بتحتاج. استعد انك اثناء العمل الحقيقي ممكن تزيد او تنقص صفحتين او ثلاث.
2- عمل السكتش المبدأي لكل صفحه: الحين امسك الاوراق الي بترسم عليها المانغا (او صفحات البرنامج الي بترسم عليه النسخة النهائية) و خذ الصفحات وحده وحده و حط المربعات بشكل مرتب, حدد اماكن الشخصيات و فقاعات الكلام و وزع المساحات حسب الاهمية.
3- التحبير: الحين ابدا ارسم الشخصيات بشكل نهائي و تفنن في رسم الشعر و العيون و الملابس. هنا بترتاح لانك حددت مواقع فقاعات الكلام مسبقاً و لا يحتاج تفكر في تفاصيل الاجزاء الي بتغطيها الفقاعات
4- وضع فقاعات الكلام: الأفضل انك تكتب ما في فقاعات الكلام قبل التونز, و كذلك إضافة التأثيرات الصوتية النصية مثل “كيااا!” أو “دوكي دوكي” لانك لما تضيف التونز بتضطر تغطيها بفقاعات الكلام و تحس انك ضيعت وقتك في تفاصيل شيء بيختفي
5- اضافة التونز او الالوان: مانغا الشوجو معروفة بكثرة التونز المستخدمه لدرجة انها تصير مثل التلوين لكن بدرجات الرمادي او لو كانت المانغا بتنعرض على موقع تقدر تلونها زي ما تحب
6- حفظ نسختين من الصفحة: لو كانت رقمية, احفظ نسخه بصيغة فوتوشوب بكل اللايرز عشان لو احتجت تقوم بأي تعديلات لاحقاً, أو عمل نسخة بلغة أخرى, و النسخة الاخرى للعرض على الانترنت بهيئة JPG و بحجم لا يتعدى الـ 800 بكسل عرضياً.
7- الاستمتاع بالعمل و القيام بأي تغييرات تراها مناسبه مهما كانت نسبة اكتمال المشروع اكثر من مرة اوصل نص الفصل و اقرر اشطب كل الي بعد الصفحة 10 و اغيره إلى شيء مختلف تماماً. اذا كنت مو متحمس لرسم محتويات باقي الفصل و تتمنى تغييرها, قم بذلك, القاريء كان سيراها ممله لو كنت ترسمها و هي مملة

—–
إضافات متنوعه
موسيقى للعمل (ملفات موسيقى صوتية مدتها تزيد عن الساعه) هدفها عدم تشتيت التركيز في البحث عن موسيقى هادئة للعمل. يعني خلك عن المطامر و البحث عن موسيقى هادئة في مجموعتك الي كلها روك و فوكالويد و افتح ملفين او ثلاثه يشغلونك ثلاث ساعات متواصلة
القائمة على اليمين كلها مجموعات موسيقية هادئة, ابحث عن الي يناسبك و حطه في المفضلة (او اصنع قائمة جديدة في يوتوب لتجميع الموسيقى المناسبه لك)
للمزيد ابحث عن: work music او اذا كنت تبي تجميع موسيقى فوكالويد او أنيمي, أو تجميع ياباني ابحث عن作業用BGM

مجموعة في ديفيانت ارت متخصصه في دروس و تجهيزات رسم المانغا manga-apps

صفحة فيها وصلات متنوعه لمدونات تمبلر متخصصة في الدروس و تجميع اي معلومات خاصة بالرسم و المانغا و التلوين (تحذير: قد يحتوي بعضها على شخلعه بعذر دراسة الجسم البشري ) خخخ
مدونة تمبلر تهتم بالرسم و التلوين بشكل عام.
مدونة أفكار للتبني: مدونة تعرض افكار خطرت على صاحبها لكنه لا يريدها اكتب او ارسم اي فكرة تعجبك منها
serendipity موقع متخصص في اختراع وصف الاشخاص و الاماكن لانك اكسل من ان تفكر بنفسك, ممتاز لتلك الشخصيات الغير مهمه في الخلفية
Seventh sanctum موقع آخر لاختراع وصف شخصيات و اماكن, لكن هذا الموقع متشعب اكثر لدرجة انه يخترع لك شخصيات الانيمي المعوقة, شخصيات البيشونين الجميلين بشعرهم الي يهبهب, اسماء سخيفة لشخصيات تحتاج تستهزيء فيها الخ
Stock exchange موقع كبير للصور المتاحه للجميع, استعمله كيفما تحب لكن اتبع قوانين الموقع عشان ما تتوهق قانونياً في بعض الصور الي لازم تشتريها

Komikku إضافة لترتيب صفحات المانغا الخاصه بك على موقع ووردبريس حقك بسهولة

الحين اظني خلصت <- إلا كأنك كتبتي موضوع جديد؟